Cinîyê rojnamegerî takîbkerdoxê rayîrê embazanê xo de yê

AMED – Cinîyê rojnamegerî yê ke 22 Nîsane Roja Rojnamegerê Kurdî pîroz kerdî û dayî zanayîş ke nuştişê rastî rê tewîz nêdê û vatî do timûtim rayîrê Gurbetellî û Denîz Firatan bê.

Rojnemeyê Kurdîstan 22ê Nîsane 1899an de Qahîre yê Misirî de dest bi weşanê xo kerd û bi 118 serrî tradîsyonê çapemanîyê kurd bi heme zor û zehmetî dewam keno. Semedê aye her serre 22 Nîsane zey Roja Rojnamegerê Kurdan yeno pîrozkerdiş. Serê nê bingeyî de rojnamegerîya kurdî her roje hîna girs bî. Rojnamegerîya kurdî û rojnamegerê kurdî ke bi Rojnameya Kurdistanî dest pê kerd heta ewro xeylê zehmetî antî. Xeylê rey rojnameyî hetê dewlete ra ameyî qedexekerdiş û xeylê rey zî rojnamegerî kurdî ameyî kiştiş û ameyî tepiştiş. La trandîsyonê çapamanîya azade hema zî dewam kenê. Rojnamegerê cinî ê ke Roja Rojnamegerîya Kurdî pîrozkerdî qala tradîsyonê çapamenîya Kurdî kerdî.

‘Vera hêrişan rojnamegerî sere nêdanê ro’

Edîtorê Rojnameya Rojeva Medya Elîf Can Alkan da zanayîş ke rojnamegerî vengê şar û komelî yo û wina va: “Semedê ey timûtim hetê komelî yê. Rojnamegerî timûtim vera sîstemê kapîtalîzmî û dîktatorî berjewendîyê komelî pawenê. Rojnamegerê Azadî verê ke hetê dewlete bê semedê koemlî xebitîyenê. La rojnamegerê medyaya tirkan semedê îqtîdarî xebitînê.” Elîfe da zanayîş ke Tirkîya de dimayê îlankerdişê OHALî ra vera çapemenîya kurdan derbe bi ca ardê û wina va: “Temamî dezgehê û televîzyonê ke bi kurdî weşan kerdêne ameyî padayîş û tarî kerdî. La rojnamegerî sereyê xo nêdayî ro. Bi îmkanê kêmî waran û kuçan de semedê weşanê rastî xo ver dayî. Tradîsyonê çapemenîya kurdî timûtim mîyanê xoverdayîşî de bî. Her roj bi hêzdar xo ver danê. Rojnamegerê çapemenîya azade qelema xo Gurbetellîyan ra, Denîz Firatan û Nûjiyanan ra gênê û ganî verdenê.”

‘Ma rojnamegerê ke azad fikrênê û azad nusnenê’

Edîtorê Rojnameya Rojeva Medyayî Nevîn Alkan zî da zanayîş ke Tirkîya de rojnamegerî mîyanê şert û mercê giranan de yenê kerdiş û va, çapemenîya azade verê ke gamanê xo peyser bierzo rastî nusnenê. Nevîne ard ziwan ke cinîyê rojnamegerê ke cayê xo çapemenîyê azad de gênê zêde rastê tedayan yenê û ard ziwan ke çapemenîya azad de çalakîbîyayîş, aktîfbîyayîş, heskerdişê cu, beşdarbîyayîşê cu bi heme awayî vuryeno û qiseykerdişê xo wina donma: “Ma rojnamegerê ke bi azadî fikrîyenê û azad nusnenê. Qasê karî kêfweşî û berbirsyarî zî girîngo. Cîyabîyayîşê rojnamegerê azadan û medyaya hetkare yewbînan ra zaf cîyayê. Semedo ke hetê wijdanî û ehlaqî, heqîqetî pawenê.”

‘Cayê ke ma tede yê ma do hîna bi hêz dewam bikerê’

Rojnameger Hûlya Emeç zî da zanayîş ke çapemenîya azade vera zor û zehmetî nuştişê rastî rê tewîz nêdanê kulturê Apê Mûsayan, Gurbetellîyan û Denîz Firatan do dewam bikerê. Hûlya bale ant ser rojnamegerê ke mintiqaya xoîdarekerdişî de xeberî taqîb kerdê û semedo ke rastî nuştê ameyî tepiştiş, Hûlya wina va: “Rojnamgerê ke çapemenîya azad de xebitînê, timûtim hetê îqtîdarî ra hedef yenê girewtiş. Semedo ke bi temamî semedê nuştişê rastî û neqlkerdişê xeberê rastîye şarî xebitînê. Bi desan televîzyon, rojname û sîteyê ma ameyî padayîş. La ma fek kar ra vera nêda. Cayê ke ma tedeyê ma hîna bi hêzdar dewam kenê. Tîya ra tepya zî do nê rastî nêvuryê.”