Cinîyan referandûm şîrove kerdî: Ma do tersê înan açarnê rastî

EDENE-WAN- Cinîyê ke netîceyê referandûmî şîrove kerdi wina vatî: “Ma sebebê nê zordarîyan baş zanê. Tersan ra hêriş kenê. Heqê înan esto ke ma ra bitersê. Semedo kem a do tersê înan bi açarnê rastî. Ma netîceyê ke bê edaletî bi qebûl nêkenê. Semedo kem a bivurnê ma do heme çî bikerê. Do xoverdayîşê ma girs bibo.

Cinîyê Edene û Wanî netîceyê referandûmî rojnameyê ma Şûjinê rê şîrove kerdî û vatî: “Îqtîdarê AKPî ke 15 serre yo hewl da yo ke cinîyan keye de heps bikero, referandûm bi guman kerde netîce bîyo û ma do vatişê ‘nê’ dewam bikerê.

‘Hîle kerdî la reyna nîmeyê komelî va ‘nê’

Sereka EMEPî Edenî Sevîl Araci:Prosesê referandumî hem şert û mercê ke têduşt nêbî û hem zî OHALî de ame kerdiş. Bi heme zor zehmetî ma do vera nê çîyan têkoşîn bikerê. Kampanyaya ‘e’ hetê heme kanalanê dewlete û kadroyê dewlete ra ame kerdiş û kampanyaya ‘nê’ zî rastê xeylê astengîyan amî. Deqeyê peynî de mudaxaleyê YSKî de referandumî de ‘e’ vejîya. Bi heme mudexelayan reyna zî Tirkîya de nîmeyê komelî vurnayîşê qanûno bingeyî ra va ‘nê’. Ma vurnayîşê qanûno bingeyî qebûl nêkenê û ma fikrîyenê ke do Tirkîya zî qebûl nêkero.

‘Ganî nê bêhûqûqî bilezgînî bêrê rastkerdiş’

Hemsereka HDPî Edeneyî Gulseren Turale: Ê referandum qezenckirdê hêzê demokrasî yê. Bi destê YSKî sera 51 rayî ‘e’ ameyî vetiş. La heme Tirkîya û dinya zî zanê rayê ‘nê’ zaf berz bî. Kesê ke referandumî de xebatê ‘nê’ kerdinê ameyî tepiştiş û rastê zordarî ameyî. Bajarê Kurdan de ê ke amebî veşnayîş û rijnayîş rayê ‘nê’ zaf vejîyayî û na zî yena manaya ke dergkerdişê destê hêzê demokrasîyê rojawanî yo. Ganî no baş bêro analîzkerdiş û cewab bêro dayîş. Mas ey HDPî netîceyê bi guman qebul nêkenê.

‘Xoverdayîşê ma do girs bibo’

Kaldiraçî ra Çagla Cemelî: Ma keye bi keye, tax bi taxe , war bi war geyrayî û ma xebatê xo kerdî. Ê ke qezenç kerdî hêzê demokrasî bî. Bi heme hîleyê xo tepiştişan çîyêk înan rê nêda qezençkerdiş. Ma sebebê nê zextan baş zanê. Semedê tersê xo hêriş kenê. Heqê înan esto ke ma ra bitersê. Ma do tersê înan açarnê rastî. Do xoverdayîşê ma girs bibo.

‘Ma nê înan vindî kerde’

Hemsereka DBPî yê Edenî Şukran Efeturk: Weçînayîşê ke edaletin nêbi. Ma her roj rastê tedayê ke ameyne. Hema zî dewam keno. Hem hetê ekonomî hem z3i hetê madî waştîke astengî vejê. La reyna zî ma qezenç kerde. Ma nê înan vindî kerde. Ma do ‘nê’ yê xo girs bikerê.

‘Êdî sebrê ma dayîkan nêmendo’

Endamê Meclîsa Dayîkê Aşitîye yê Wanî Zekîye Kaya: Êdî sebrê ma dayîkan nêmendo. Serekkomar zî baş zano bi hîlan qezenç kerdo. Beno ke fermî de qezenç bikero la goreyê ma qezenç nêkerdo. Hukmat wina fikrîya ke do tepiştişê parlementer û hemserakanê ma do ma biqedênê. La hêzê înan nêeşkeno ma biqedêno. Senîn bi serran o ke vera zilmî xoverdayîşê ma dewam keno, ewro ra tepya zî do xoverdayîşê ma dewam bikero. Xoverdayîşê ma bi Mazluman dewam kerd do bi Mazluman zî serkwete bo.”

‘Ma bi kede xo qezenç kerde’

Kewê İşik: Şarê kurd wezîfeyê xo ard bi ca û kedêke pil ma da ke ‘NÊ’ vejîyo. Ma bi kede xo qezenç kerde. Hukmatî vindî kerd. Ser sindoqan de zaf kayî kay kerdî, la reyna qezenç nêkerdî. Leşker û polîsan bi sîlehê xo derûdorê sindoqan girewtî bi ke şar bitersnê. Xeylê hîleyî ameyî kerdiş. Rayê akerde xebitnayî, ma dayîkî nê çîyan qebul nêkenê. Her rayêke gonîya merdimî bî înan bi gonîya merdiman kay kerdî. Heta ke ma bibê ma do xover bidê. Serkewtiş ê şarî kurdî yo. Şarê kurdan qezenç kerd. Ma pey rêçe domananê xo de yê.”

‘Serkewtiş do ê ma bo’

Xezal Şedal: Bi dizdî kes nêşkeno bi reso amancê xo. Şar heme vera nê rejîmî bê û raya ‘Nê’ cewab dayî. La hukmatî bi diznayîş, hîle û kayan fermî de qezenç kerdî. Ma nê çî qebul nêkenê. Ma do serkewê û serkewtiş ê ma yo.

‘Ma do heqê xo bigîrê’

Saniye Telsac: Ma nê qanûnan qebul nêkenê. Ma cinî ma do bi yewîya xo n3e zordarî biqedênê. Ma do heqê xo bigîrê û ma do nê çî qebul nêkerê.